नेपाली सन्देश डट कम | २१ जेष्ठ २०८२, बुधबार १९:१२ 
काठमाडौं । सभामुख देवराज घिमिरेसँग बुधबार नेपालका लागि जोर्डनका गैर आवासीय राजदूत युसेफ अब्देलघानीले सिंहदरवारमा शिष्टाचार भेट गरेका छन् । भेटमा आर्थिक तथा श्रम सम्बन्ध र संसदीय आदान प्रदानबारे छलफल भएको छ ।भेटमा सभामुख घिमिरेले नेपाल र जोर्डन प्राकृतिक सम्पदाले भरिपूर्ण मुलुक भएकाले दुवै तर्फबाट पर्यटन विकासको क्षेत्रमा सहकार्य गर्ने सम्भावना रहेको बताए । ‘नेपाल सगरमाथाको देश भएकाले जोर्डनी नागरिकहरुलाई हिमाल आरोहणको लागि हामी प्रोत्साहित गर्दछौँ,’ उनले भने ।सभामुख घिमिरेले सन् २०१७ मा दुई देशबीच द्विपक्षीय श्रम सम्झौता भएपछि जोर्डनमा करिव ३ हजार नेपाली कामदार विशेषगरी महिला कामदार घरेलु काम तथा गार्मेन्ट सेक्टरमा कार्यरत रहेको बताए । ‘यति ठूलो संख्यामा नेपालीहरुलाई रोजगारीको अवसर प्रदान गरेकोमा जोर्डनी जनता तथा सरकारप्रति हार्दिक आभार व्यक्त गर्दछु । श्रम आप्रवासनको क्षेत्रमा थप सहकार्य गर्ने सम्भावनाको खोजी गरिनुपर्छ भन्ने मलाई लागेको छ,’ उनले भने ।सभामुखले नेपालमा हुने रासायनिक मल अभावका लागि जोर्डनसँग सहकार्य गर्न सकिने उल्लेख गर्दै नेपालको कृषिजन्य उत्पादनलाई आफ्नो मुलुकमा लैजानका लागि सहयोग गर्न राजदूतको ध्यानाकर्षण गराए । उनले हाल नेपाल आर्थिक वृद्धिलाई तीव्र पार्न, दिगो विकास लक्ष्यहरू हासिल गर्दै अल्पविकसित राष्ट्रबाट यथासमयमै स्तरोन्नति सुनिश्चित गर्न क्रियाशील रहेको बताए ।जोर्डनका गैर आवासीय राजदूत युसेफ अब्देलघानीले दुई मुलुकबीच अन्तर्राष्ट्रिय व्यापार सम्बन्ध वृद्धि गर्ने प्रचुर सम्भावना रहेको बताउँदै त्यसबाट दुवै मुलुकले फाइदा लिन सक्ने बताए । उनले जोर्डनमा नेपाली कामदारलाई आफ्नो मुलुकले पारिश्रमिक र सामाजिक सुरक्षा सम्झौता बमोजिम प्रदान गरिरहेको जानकारी दिए ।नेपाल र जोर्डनबीच १९६५ अगस्ट २० मा कूटनीतिक सम्बन्ध स्थापना भएदेखि नै दुई मुलुकबीचको सम्बन्ध प्रगाढ र सुदृढ रहेको बताए ।
प्रतिक्रिया