नेपाली सन्देश डट कम | ३ बैशाख २०८२, बुधबार १०:३२ काठमाडौं । अमेरिकाबाट नेपाल आएकी अभिनेत्री अरुणिमा लम्साल अहिले विभिन्न मिडिया हाउसहरू पुगेर अन्तर्वार्ता दिन व्यस्त छिन् । अन्तर्वार्तामा प्रश्नोत्तरको मुख्य विषय भइरहेको छ उनको डिभोर्स ।
अरुणिमा निकै उत्साहसाथ डिभोर्ससम्बन्धी प्रश्नहरूको जवाफ दिइरहेकी छन् । त्यसमा पनि प्राइम टिभीमा ऋषि धमलासित भएको प्रश्नोत्तर अलि रोचक छ । धमलाले आफ्नै शैलीमा बेतुकका प्रश्नहरू सोधेर अरुणिमालाई हैरान पारेका छन् ।
अन्तर्वार्तामा अरुणिमाले श्रीमान युवराज श्रेष्ठले आफूलाई विभिन्न कुराहरू ढाँटेर बिहे गरेको बताइन् । त्यसपछि धमलाले बारम्बार सोधिरहन्छन्- उहाँले किन ढाँट्नुभो, जनतालाई बताइदिनुस्, आज तपाईंले बताउनैपर्छ, तपाईं सुन्दर नायिका हो… ।
अरुणिमाले आफूलाई ढाँटेको विषय र प्रसंग भने कसैगरी खुलाउन चाहिनन् ।
‘चार-पाँच वटा कुरा छन्, तर म अहिले भन्दै भन्दिनँ’ उनले गलल हाँस्दै भनिन् ।
उनले श्रीमानमाथि अमेरिका जानका लागि मात्रै आफूसित बिहे गरेको आरोप लगाइन् ।
‘मलाई जीवन साथी बनाउने चाहना उहाँको रहेनछ । खाली मसित बिहे गरेर अमेरिका जाने सोच रहेछ । उहाँको अमेरिका जाने सपना चकनाचुर भयो,’ अरुणिमाले भनिन् ।
आफूले डिभोर्सका लागि मुद्दा हाले पनि श्रीमान त्यसमा तयार नभएको उनको गुनासो छ । तर, केस फाइल गर्नासाथ आफू सिंगल भइसकेको उनले दाबी गरिन् ।
‘कानून अनुसार पनि र धर्मशास्त्र अनुसार पनि महिलाले डिभोर्स केस फाइल गर्नासाथ श्रीमान-श्रीमतीको सम्बन्ध सकिँदो रहेछ । मेरो गोत्र पनि फिर्ता हुँदो रहेछ । उहाँ मेरो पूर्वपति भइसक्नुभयो । उहाँले हस्ताक्षर गर्नुभएन भने पनि एक वर्षपछि स्वतः डिभोर्स हुन्छ,’ उनले भनिन् ।
धमलाले हचुवामै सोध्छन्- उहाँको अर्को पनि श्रीमती छ भन्ने कुरा तपाईँलाई थाहा थिएन ?
अरुणिमाले त्यो चाहिँ आफूले नसुनेको बताइन् ।
धमला फेरि सोध्छन्- उहाँसँगै बस्नुभो, सँगै खानुभो, विवाह गर्नुभो । अनि थाहा छैन भन्न पाइन्छ ?
अरुणिमा भन्छिन्- म सँगै बसिनँ हजुर । हामी सँगै बस्या छैन ।
धमलाको अर्को जिज्ञासा- श्रीमानसँग तपाईंको सम्बन्ध भयो कि भएन ?
अरुणिमाः भएन । उहाँले मलाई मूलघरमा भित्र्याउनुपर्छ भनेर भन्नुभएको थियो । मूलघरमा चाहिँ वैशाखमा मात्रै भित्र्याउने कुरा थियो । हजुर वैशाखमा आउनुस् भन्नुभएको थियो । अहिले चाहिँ उहाँलाई अप्लाइ गर्नुपर्छ भनेर खाली कागजीरूपमा मात्रै विवाह गरिएको हो । सबै रितिरिवाज वैशाखमै गर्ने योजना थियो ।
धमलाः त्यसो भए जनतालाई बताइदिनुस्, अब अर्को बिहे कहिले गर्नुहुन्छ ? आज तपाईँले बताउनैपर्छ ।
अरुणिमाः त्यो अहिले सोचेको छैन
धमलाः तपाईंलाई अब कस्तो केटा चाहिन्छ ?
अरुणिमाः झूटो नबोल्ने, सच्चा, इमान्दार, मिहिनेति, मलाई बुझ्ने, माया गर्ने, मेरो रेस्पेक्ट गर्ने ।
विवाह र डिभोर्सको प्रश्नोत्तर हुँदै गर्दा धमलालाई के सुर चढ्छ, फ्याट्ट सोध्छन्- त्यसो भए तपाईं देशमा राजतन्त्र चाहनुहुन्छ कि गणतन्त्र ?
प्रतिक्रिया