तौल घटाउने र मधुमेहका सुईले ज्यान नै जान सक्ने साइड इफेक्ट गराउन सक्ने खतरा

  नेपाली सन्देश डट कम | १२ असार २०८२, बिहीबार १०:४६

बेलायतको औषधि तथा स्वास्थ्य सामग्री नियामक निकायले सार्वजनिक गरेको नयाँ विवरण अनुसार तौल घटाउने र मधुमेह उपचारमा प्रयोग हुने केही औषधिहरूले अग्न्याशयमा सुजन (प्यान्क्रियासको सुजन) गराउन सक्ने खतरा रहेको देखिएको छ।

बेलायतमा ती औषधिहरू करिब १० लाखभन्दा बढी व्यक्तिले प्रयोग गरिसकेका छन्। ती औषधिहरू प्रयोगपछि गम्भीर स्वास्थ्य समस्या देखिएको र केही व्यक्तिको मृत्यु समेत भएको विवरणमा उल्लेख छ।

नियामक निकायका अनुसार:

एक प्रकारको औषधिसँग सम्बन्धित १८१ वटा प्यान्क्रियास सुजनका घटना रिपोर्ट भएका छन्, जसमा ५ जनाको मृत्यु भएको छ।

अन्य दुई किसिमका औषधिहरू प्रयोगपछि ११३ वटा यस्तै घटनाहरू देखिएको र १ जनाको मृत्यु भएको उल्लेख गरिएको छ।

यसबाहेक, यस्ता किसिमका औषधिहरूको अन्य संस्करणहरू प्रयोग गर्दा पनि यस्तै प्रकारका घटना र मृत्युका विवरणहरू भेटिएका छन्।

यद्यपि, ती मृत्युहरू ती औषधिका कारणले नै भएको भन्ने स्पष्ट प्रमाण भने हालसम्म भेटिएको छैन। त्यसैले औषधि नियामक निकायले ती औषधिहरूको पहुँचमा हाललाई कुनै प्रतिबन्ध लगाएको छैन।

किनभने प्यान्क्रियासको सुजन त ती औषधि प्रयोग नगर्ने व्यक्तिहरूमा पनि देखिन्छ। सामान्य जनसंख्यामा हरेक १० लाख व्यक्तिमा करिब ५६० जनामा यस्तो समस्या देखिन्छ। यसको प्रमुख कारणहरूमा पित्तथैलीमा हुने पत्थरी र अत्यधिक मद्यपान रहेका छन्।

यस्ता औषधिहरू प्रयोग गर्नु अघि वा प्रयोग गरिरहँदा शरीरमा पर्न सक्ने असरबारे चिकित्सकसँग सल्लाह लिनु उपयुक्त हुन्छ।

प्रतिक्रिया

Selected poll is not defined.