नेपाली सन्देश डट कम | ८ चैत्र २०८१, शुक्रबार ०५:१४ 
लन्डन । लन्डनको हिथ्रो विमानस्थल शुक्रबार पूरै दिनका लागि बन्द हुने भएको छ। बीबीसीका अनुसार विमानस्थल नजिकै रहेको एउटा इलेक्ट्रिकल सबस्टेसनमा ठूलो आगलागी भएपछि विमानस्थललाई आपूर्ति हुने बिजुली अवरुद्ध भएको हो।
विमानस्थलले जारी गरेको विज्ञप्तिमा भनिएको छ, ‘आगलागीका कारण विमानस्थलमा ठूलो परिमाणमा बिजुली आपूर्ति अवरुद्ध भएको छ।’ विज्ञप्तिमा थप भनिएको छ, ‘हाम्रा यात्रु र सहकर्मीहरूको सुरक्षाका लागि, हिथ्रो विमानस्थल मार्च २१ को मध्यरात २३:५९ बजेसम्म बन्द रहनेछ।’
यात्रुहरूलाई हवाई मैदानमा नजान सल्लाह दिँदै थप जानकारीका लागि आफ्नो एयरलाइनसँग सम्पर्क गर्न अनुरोध गरिएको छ। विज्ञप्तिमा यात्रुलाई भएको असुविधाप्रति क्षमायाचना पनि गरिएको छ।
ब्रिटेनको सबैभन्दा ठूलो विमानस्थल मानिने हिथ्रोमा दैनिक करिब १,३०० विमानहरू अवतरण र उडान गर्छन् ।
हिथ्रो बेलायतको सबैभन्दा ठूलो उड्डयन केन्द्र हो, जसले प्रत्येक दिन करिब १,३०० अवतरण र उडानहरू सञ्चालन गर्छ। यसको पछिल्लो विवरण अनुसार, गत वर्ष ८३.९ मिलियन यात्रुहरू यसको टर्मिनलहरू हुँदै यात्रा गरेका थिए।
उडान ट्र्याकिङ वेबसाइटका अनुसार, शुक्रबारको बन्दका कारण हिथ्रो आउजाउ गर्ने कम्तीमा १,३५१ उडानहरू प्रभावित हुनेछन्, जसमा बिहानै १२० भन्दा बढी विमान आकाशमै रहेको थियो।
पश्चिम लन्डनको हेसस्थित एउटा सबस्टेशनमा लागेको आगोका कारण हजारौँ घरहरू विद्युत्विहीन भएका छन् भने वरपरका करिब १५० जना मानिसलाई स्थानान्तरण गरिएको छ।
प्रतिक्रिया