नेपाली सन्देश डट कम | २२ पुष २०८१, सोमबार ०६:२६ 
काठमाडौं । गैरआवासीय नेपाली संघ (एनआरएनए) को एकतासम्बन्धी उच्चस्तरीय समितिको तेस्रो बैठकमा संघका तीन पूर्वअध्यक्षहरू अनुपस्थित रहे।
आइतबार सम्पन्न उक्त बैठकमा समितिका संयोजक शेष घलेको नेतृत्वमा हुने भनिए पनि, डा. उपेन्द्र महतो, जीवा लामिछाने र कुमार पन्त उपस्थित भएनन्। यसैगरी, संघका वर्तमान अध्यक्ष डा. बद्री केसी समेत बैठकमा अनुपस्थित थिए।
समितिका संयोजक शेष घलेले दावी गरे अनुसार बैठकमा परराष्ट्र र कानूनी मन्त्रालयका प्रतिनिधिहरूको सहभागिता रहेको थियो। तथापि, बैठकमा उपस्थित दुई कर्मचारीहरूले सर्वोच्च अदालतको दोस्रो फैसलालाई ध्यानमा राख्दै, परराष्ट्र मन्त्रालयको पत्र प्राप्त नभएसम्म औपचारिक रूपमा बैठकमा सहभागी नहुने जनाए। यसैले ती कर्मचारीहरू बैठकबाट बाहिरिएका थिए।
यसअघि घलेको एकल नेतृत्वमा भएका निर्णयहरूको कार्यान्वयनमा समस्या आएको थियो, जसले संघभित्र थप विभाजन निम्त्याएको छ। सर्वोच्च अदालतको दोस्रो फैसलाले डा. बद्री केसीको नेतृत्वलाई वैध मानेको छ, र यसलाई बेवास्ता गर्दै शेष घलेको समूहले अघि बढ्नाले संघमा असहमतिहरू पैदा भएका छन्।
यद्यपि, शेष घलेले आगामी मे ३ देखि ५ सम्म काठमाडौँमा संघको दशौँ एकता महाधिवेशन आयोजना गर्ने दावी गरेका छन्। यस भेलालाई नेपाल सरकार, एनआरएनए र संघका पूर्वअध्यक्षहरूले मान्यता नदिएको अवस्थामा घलेको समूह एकल प्रयासमा अघि बढिरहेको छ।
यसै बीच, केही दिनअघि मात्र शेष घलेले एनआरएनएबाट अलग भएर सोनाम लामाको अध्यक्षतामा युनाइटेड नेपाली डायस्पोरा अर्गनाइजेशन (यूएनडीओ) को औपचारिक घोषणा गरेका थिए, जसले संघका आन्तरिक विवादलाई थप चर्काएको छ।
प्रतिक्रिया