२६ वर्ष भयो । उनी हरेक विहान गीत गुन्गुनाउँदै रेडियो नेपाल जान्छन् र गीत गुन्गुनाउँदै र्फकने गर्दछन् । विगत ३ दशक भन्दा बढी समयदेखि संगीत यात्रामा निरन्तर लागेका यी स्रष्टा हुन् - बुलु मुकारुङ ।
उनी आफूलाई राई र वान्तवा भाषी भन्छन् । नेपाली गीत संगीत क्षेत्रमा एक हजार भन्दा बढी गीतमा उनका सुगम संगीतहरु सुन्न सकिन्छ । बुलु मुकारुङको जन्म कोशी अञ्चलको भोजपुर जिल्ला अन्नपूर्ण गाविसमा वि.सं. २०१६ साल पौष २२ गते भएको हो । आमाको मायामा हुर्केका उनले आफ्ना बुवाको भने माया पाउन सकेनन् । मुकारुङ ४ वर्षको हुँदा नै उनका बुवाको मृत्यू भएको थियो ।
बाल्यकाल देखिनै गीत संगीतलाई माया गर्न थालेका उनले अध्ययनसँगै संगीत यात्रालाई अघि बढाए । परिवारमा कोही पनि सांंगीतक क्षेत्रमा नभएको बताउने मुकारुङ आफूले कडा संघर्ष गरेर यो क्षेत्रमा स्थापित भएको उल्लेख गर्छन् । मुकारुङ स्कूलमा हुने विभिन्न सांस्कृतिक कार्यक्रममा जहिले पनि नाच्न र गाउनमा हुरुक्क हुन्थे । त्यसैले होला त्रिचन्द्र कलेजबाट फिजिक्स विषय लिएर आए.एस.सी पास गर्ने वित्तिकै रेडियो नेपालमा जागिरे जीवन सुरु गरेपछि विभिन्न गीतहरुमा संगीत दिन थाले उनले ।
नेपाली कलाकारिता क्षेत्रमा लाग्ने व्यक्तिहरु कम नै पढेका हुन्छन् । तर त्यही यात्रामा लाग्ने केही मानिसले शिक्षालाई पनि राम्ररी नै अघि बढाएका छन् । यही सिमित व्यक्तिमा पर्छन् मुकारुङ पनि । पढ्न भनेर राजधानी आएपछि पढाई र संगीतको यात्रालाई सँगसँगै लिएर हिँडेका उनी त्रिचन्द्र कलेजबाट आइ.एस.सी उत्तिर्ण गरेपछि बी.ए. र एम्.ए. भने कल्चरमा गर्न पुगे । त्यसो त ललितकलाबाट म्यूजिकमा स्नातकोत्तरको अध्ययन समेत पुरा गरेका छन् उनले ।
हरबखत संगीतमा व्यस्त रहने उनी संगीतका अतिरिक्त साहित्य र गायनमा पनि अगाडि छन् । मुकारुङका 'माया तिमीलाई केही भन्न मन लाग्छ...., 'इलामे शहर चियावारी राम्रो, त्यही पर्यो घर हाम्रो..., 'मिर्मिरेमा तिमीलाई भेट्न मन लाग्छ ...,जस्ता दर्जनौ गीतहरु निकै लोकपि्रय बनेका छन् ।
गीतसँग भावना हुनुपर्छ भन्ने धारणा राख्ने मुकारुङ नेपाली शैली र जीवनमा आधारित गीतहरुमा संगीत दिन मन पराउँछन् । पछिल्लो समयमा गीत संगीतको स्तर खस्कदै गएको बताउने उनी गुणस्तरीय गीतको खोजीमा जुटेका छन् ।
गीत संगीतकै माध्यमबाट विभिन्न देशहरुको भ्रमण गरेका उनले नेपाल र नेपालीको मायाकै कारण विदेशमा बसोबास गर्न मन पराएनन् । त्यसैले त उनी नेपाल र नेपालीका लागि निरन्तर संगीत यात्रामा लागिरहने इच्छा ब्यक्त गर्दछन् । पछिल्लो समयमा कलाकारहरु विदेशमा गएपछि नर्फकने र विदेश पलायन हुने क्रम बढेको छ । यसबारेमा मुकारुङ आर्थिक प्रलोभनले कलाकारलाई बिदेश पलायन गराएको बताउँछन् । -'अहिलेका कलाकारहरुलाई पुँजीवादले छोएको छ, छिट्टै धनी बनुँ भनेर उनीहरु विदेश गएका हुन् ।' संगीतकार मुकारुङले हामीसागको भेटमा भने -'एउटा दुइटा एल्वम निकालेर कलाकारको नाममा भिसा लिएर गलत ढंगले विदेश जानेहरु बढेका छन् ।' सुगम संगीत नै अजर हुन्छ भन्ने मुकारुङले आधुनिक गीतमा सवैभन्दा बढी संगीत दिएका छन् । पछिल्लो समयमा आधुनिक गीतको व्यवसाय घटेको छ । तर पनि आधुनिक गीतले जीवन्तता प्रदान गर्ने भएकाले व्यवसायीक र व्यापारिक कुरालाई छोडेर आफू आधुनिक गीतमै लागीपरेको उनको भनाई छ । अहिलेको समयमा व्यवसायीक र व्यापारिक गीतहरुले बढी चर्चा पाउने गरे पनि आफू त्यस्ता क्षणिक गीतको पछि नलाग्ने मुकारुङको भनाई छ ।
२०४१ देखि २०५१ सालसम्म एकदमै राम्रो विकास भएको आधुनिक गीतको बजार अहिले निकै खस्कँदै गएको उनको ठहर छ । अहिलेका गीतहरु गुणमा कमजोर र संख्यात्मक रुपमा बढी भएको बताउने उनी पुराना शैलीका गीतलाई जीवन्त बनाउन चाहन्छन् ।
